Претседателката на Молдавија, Маја Санду, изјави дека нејзината земја би можела да ѝ се приклучи на Европската унија до 2028 година.
Поранешната советска република се стреми кон членство во ЕУ и во НАТО од 2020 година, кога Санду, гласен критичар на Русија, дојде на власт. Молдавија доби статус на кандидат за ЕУ во 2022 година, заедно со Украина. Повторно избрана минатата година во оспорен и многу дебатиран втор круг, Санду ги засили напорите за забрзување на процесот на пристапување.
Прашана за време на интервјуто во понеделникот за локалниот радиодифузер ТВ8 за временската рамка, Санду рече дека има намера да ги заврши преговорите до крајот на 2027 година.
„До 2028 година очекуваме секоја земја-членка на ЕУ да ги ратификува нашите договори. На тој начин ќе го завршиме процесот до крајот на мандатот на сегашната Европска комисија“, рече Санду.
Мандатот на Комисијата, предводена од претседателката Урсула фон дер Лајен, трае од декември 2024 до декември 2029 година.
Шефицата за надворешна политика на ЕУ, Каја Калас, минатиот месец изјави дека пристапувањето на Молдавија до 2028 година зависи од темпото на реформите во земјата и од едногласната поддршка од 27. членки на блокот.
