Осомничениот за смртоносниот напад на божиќниот пазар во германскиот град Магдебург, државјанин на Саудиска Арабија идентификуван како Талеб ал Абдулмохсен, претходно имал судири со органите на прогонот, објавија повеќе медиуми во саботата. Барањата на неговата матична земја за екстрадиција, сепак, беа дочекани со молчење.
Саудиска Арабија ги предупреди германските власти за мажот пред околу една година, пренесе ДПА. Природата на предупредувањето, сепак, не беше веднаш позната. Ријад, исто така, побара екстрадиција на 50-годишниот лекар, но не доби одговор од Берлин, изјавија за новинската агенција безбедносни извори на кралството.
Германски безбедносни извори изјавија дека Саудиска Арабија неколкупати ги предупредила властите во земјата во врска со екстремистичките ставови што осомничениот отворено ги изразил на Твитер, пренесува Ројтерс. Се вели дека Талеб бил радикален антиисламист, кој јавно се откажал од својата религија.
Осомничениот престојува во Германија од 2006 година, но статусот на заштитено лице го доби дури во 2016 година. Пред тоа, тој имаше судир со германските закони во 2013 година, кога беше осуден за „нарушување на јавниот мир со закана за злосторства“, објави „Шпигел“.
Човекот на крајот беше казнет со околу 900 евра и му беше дозволено да остане во Германија, особено поради стравувањата дека ќе биде „веднаш погубен“ доколку биде вратен во неговата земја на потекло, се сугерира во извештајот. Осудата очигледно не влијаела на неговото барање азил.
Осомничениот, наводно, влетал во толпата на божиќниот пазар во Магдебург во петокот вечерта, убивајќи најмалку пет лица, меѓу кои и едно дете, а повредил околу 200 други, вклучително и 41, кои сега се во сериозна или критична состојба.
Засега, мотивот зад нападот останува нејасен, соопштија властите во саботата. Обвинителот од Магдебург, Хорст Нопенс, сепак, посочи дека нападот би можел да биде поттикнат од незадоволството на осомничениот од начинот на кој Берлин се справува со бегалците од Саудиска Арабија. Напаѓачот сега се соочува со пет обвиненија за убиство, како и со над 200 обвиненија за обид за убиство, соопшти обвинителството.
