Премиерот Заев денеска по сослушувањето за случајот „Поткуп“ најави дека ќе ги почитува судските одлуки и дека oчекува правда.
Откако на последното рочиште не се појави со образложение дека имал средба со италијанскиот амбасадор во Скопје што беше демантирано од амбасадата на Италија, денеска премиерот се појави на суд.
За разлика од неговата одбрана која бара снимката на која се гледа како од струмички бизнисмен за издавање дозвола бара да даде едно евро на неговиот брат Вице Заев, тој сака снимката да излезе во јавноста. Заев смета дека преку видеото може да се види целовитоста на дејствието коешто се случувало и да се види дека ниту имал намера, ниту барал поткуп.
Додека на различни судски и политички инстанци се води жешка дебата дали илегално прибавени снимки како тие од „Бомбите“ што ги објави токму Заев, можат да се користат како докази за судски процеси, одбраната на премиерот бара вакви снимки да не можат да бидат доказ во неговиот случај.
Следното рочиште за случајот „Едно евро за Вицето“ е закажано за 3 месеци, на 27 септември
