Обвинителството за организиран криминал денеска издаде национална потерница за четворицата бегалци од вкупно 36 лица осомничени за настаните од 27 април во Собрание, а за притворите на приведените Кривичен суд ќе решава утре.
За Александар Василевски-Нинџа, за Никола Митревски–Кољо и уште две лица ќе се распише и меѓународна потерница, бидејќи безмалку еден месец се недостапни на органите на прогонот, а Судот во отсуство им изрече 30-дневен притвор.
На ексминистерот за внатрешни работи Митко Чавков, на шестемина пратеници, на водачите на граѓанската иницијатива „За заедничка Македонија“ и на останатите лица приведени на 28 ноември притворот им истекува утре, а Обвинителството бара тој да им се продолжи за уште 30 дена.
Покрај Чавков, кој при упадот на демонстрантите во Собрание беше директор на Биро за јавна безбедност, во истражниот затвор во Шутка се наоѓаат пратениците Крсто Мукоски, Сашо Василевски и Љубен Арнаудов, фронтмените на протестите Борис Дамовски, Богдан Илиевски, Игор Дурловски, Владо Јовановски итн. Во домашен притвор се пратениците Јохан Тарчуловски, Љупчо Димовски и Жаклина Пешевска.
