Американскиот секретар за одбрана Лојд Остин во четвртокот предупреди дека НАТО ќе биде вовлечен во војна доколку Украина биде поразена од инвазијата на руските сили.
Говорејќи на сослушувањето на Комитетот за вооружени служби на Претставничкиот дом предводен од републиканците, Остин предвиде дека рускиот претседател Владимир Путин нема да „запре“ доколку Москва победи во војната во Украина, пренесе Newsweek.
Американскиот Конгрес се уште не го одобри пакетот воена помош од 60 милијарди долари за Украина, како што побара претседателот Џо Бајден.
„Знаеме дека ако Путин е успешен тука, тој нема да запре“, рече Остин.
„Тој ќе продолжи да презема поагресивни дејствија во регионот. И други водачи ширум светот, други автократи, ќе го разгледаат ова и ќе бидат охрабрени од фактот дека ова се случи и не успеавме да поддржиме демократија“.
Остин смета дека балтичките нации – Летонија, Литванија и Естонија – се особено ранливи на идните експанзионистички амбиции на Путин. Сите три земји се членки на НАТО, што значи дека Русија во суштина ќе објави војна на целата стратешка алијанса со напаѓање на која било нација.
„Ако сте балтичка држава, навистина сте загрижени дали сте следниот или не“, рече тој.
„Тие го познаваат Путин, знаат за што е способен… И сосема искрено, ако Украина падне, навистина верувам дека НАТО ќе биде вовлечен во борба со Русија“.
