Новата Влада на * Македонија ќе добие заем од Унгарија од една милијарда евра според исклучително поволни услови. Унгарските медиуми забележаа дека ова е историски најголемиот заем, што Владата во Будимпешта некогаш му го одобрила некому, откако Виктор Орбан ја презеде власта.
Идниот министер за транспорт и врски Александар Николоски од ВМРО-ДПМНЕ потврди дека новата Влада, чие гласање е закажано за утре, ќе се задолжи за една милијарда евра во странство, а заемот нема да се земе од Кина, туку од ЕУ и НАТО земја-членка. „Се одлучивме на овој чекор, бидејќи каматните стапки на меѓународните институции, како што се Светската банка и Меѓународниот монетарен фонд, во моментов се поголеми од 5 проценти.“ – вели Николоски.
Заемот ќе покрие по 250 милиони евра за општините, и исто толку за стопанските комори, како и за новата енергетска инвестиција од 460 милиони евра. Се работи за заем со многу поволни услови: со каматна стапка од 2,59 проценти и со одложен почеток на плаќање од 3 години.
