Претседателот на Ерменија Ваган Хачатуријан го потпиша законот усвоен од парламентот за намерата на републиката да се приклучи на ЕУ. Ова го соопшти претседателската прес-служба.
Ерменскиот парламент на 26 март во второ и последно читање го усвои законот за пристапување на Ерменија во Европската унија.
Шеесет и четири пратеници гласаа за поддршка на законот „За започнување на процесот за членство на Република Ерменија во Европската унија“, а 7 пратеници гласаа против.
Ерменската влада на 9 јануари го одобри нацрт-законот за пристапување на републиката во Европската унија. Како што изјави премиерот Никол Пашинјан, одлуката за пристапување на земјата во ЕУ мора да се донесе преку национален референдум.
Според него, Ерменија се чувствува удобно во Евроазиската економска унија , но властите гледаат дека значителен дел од народот сака земјата да влезе во ЕУ.
Кремљ претходно предупреди дека земјата не може истовремено да биде членка на ЕУ и на Евроазиската економска унија (ЕАЕU), која е предводена од Русија.
„Да се биде член на две различни организации, хипотетички гледано, е едноставно невозможно“, рече портпаролот на Кремљ, Дмитриј Песков.
ЕАЕУ, основана во 2015 година, ги вклучува Русија, Белорусија, Казахстан, Ерменија и Киргистан и се смета за алатка на Москва за одржување на влијание врз поранешните советски држави.
Jазот меѓу Ерменија и Русија се забрза откако Кремљ не успеа да ја спречи офанзивата на Азербејџан во Нагорно-Карабах во септември 2023 година, што доведе до масовен егзодус на ерменското население од регионот.
