Студентите најверојатно ќе останат без бесплатен јавен превоз. Билетите на студентите за наредната 2025 година не се продолжуваат. На оние кои се обиделе да ги продолжат билетите во билетарниците им било кажано дека треба одобрение од надлежните за нивно продолжување. Од Универзитетското студентско собрание на Универзитетот „Св.Кирил и Методиј“, велат дека веќе пратиле апел до Владата, Министерството за образование и наука, Советот на Град Скопје, градоначалничката Данела Арсовска и до ЈСП „Скопје“, како што рече, „да се произнесат јавно дали се предвидени средства за бесплатен превоз на студентите во градот Скопје“.
- Затоа што билетите за 2025 не се продолжуваат на билетарниците на ЈСП. Од друга страна, од МОН се произнесоа дека се предвидени средства. Во текот на септември градоначалничката имаше дадено изјава дека има заостанат долг во неколку милиони денари којшто треба да се плати, покрај од страна на Министерството и Владата. Останува да почекаме одговор од страна на институциите. Доколку не, УСС на УКИМ ќе преземе соодветни реакции и мерки со кои ќе го искаже ставот. Смешно е студентите да немаат бесплатен превоз, мерка што е обезбедена десет години по ред од страна на Владата. Во програмата на сегашниот градоначалник беше мерката бесплатен јавен превоз за сите граѓани, а сега доаѓаме во ситуација кога се зборува за укинување на превозот за студентите што навистина не би било во ред за студентскиот стандард, изјави Николоски.
На прашањето какво образложение добиле од институциите, одговори рече дека „дел кажуваат дека нема да има бесплатен градски превоз“, а од ЈСП во телефонска комуникација им било кажано дека „се уште се чека одлука од Град Скопје“.
- Одговорот од МОН е дека има предвидено средства, чекаме да се произнесе дали ќе има или ќе нема за веќе да може да им ги продолжат картичките на студентите. Секојдневно комуницираме, во текот на идната недела веќе треба да има одговор од страна на институциите, изјави претседателот на студентската организација на УКИМ.
Доколку останат без бесплатен превоз, една од опциите, рече Николоски, е да протестираат пред институциите. На промоцијата присуствуваше и заменик-министерот за образование и наука Лулзим Алиу кој на прашањето за проблемот со бесплатниот превоз на студентите во Скопје, колку пари должи МОН и дали се обезбедени средства во буџетот, кој Собранието го усвои минатата недела, не одговори конкретно.
- Одговорот на тоа прашање треба да го побарате кај градоначалничката бидејќи Министерството веќе има изнесен став. Овој проблем што сега е појавен е во одговорност на Градот Скопје и на градоначалничката. Можам да кажам дека во буџетот за 2025 се предвидени средства за транспорт на студентите, но за тоа ќе треба да се донесе дополнителна одлука од страна на Владата. Буџетот треба да помине на Собрание, да не кажуваме бројки кои може да бидат изменети и додека се носи буџетот, рече Алиу.
Пратеничката од ЛДП Моника Зајкова повика „институциите да престанат да си ја подаваат топката едни на други“ и, како што рече, „во најкраток можен рок, до крајот на неделава или наредната да го решат ова прашање на студентите“.
Драгана Бојкова, пратеничка од ВМРО-ДПМНЕ и претседателка на собранискиот Клуб на млади, не прецизираше каде е проблемот и решението за превозот, но во изјавата се осврна на досегашните политики на Владата за подобрување на студентскиот стандард и условите во студентските домови.
Во својата изјава за медиумите таа соопшти дека во буџетот за 2025 се предвидени повеќе средства за субвенциониран студентски оброк и дека во договор со студентите ќе се одредува дали таа субвенција ќе ја има истата сума или ќе се зголеми опфатот на студентите што ќе го имаат тоа право.
Мерката почна да се применува од 2016-та година. За време на коронавирусот кога наставата беше онлајн, тогашната Влада не ја продолжи мерката и вети дека штом студентите се вратат со физичко присуство пак ќе обезбедат пари. Но, и покрај тоа не предвиделе и не исплатиле пари, па ЈСП три години доброволно ги вози студентите бесплатно.
