Премиерот Зоран Заев во интервју за виенски „Стандард“ вели дека во Македонија постои подготвеност за компримиси на патот за ЕУ, но дека не е видлива подготвеност во Унијата.
„Го сменив името на земјата, а потоа победив на изборите. И тоа е затоа што граѓаните почнаа да веруваат во иднината.
Кога го потпишав Договорот од Преспа со тогашниот грчки премиер Алексис Ципрас во 2018 година, 85% од граѓаните беа против. Ми се заканија, запалија пожар пред мојата куќа, имаше хаос во земјата и имаше протести и во Грција.
Потоа победив на изборите.
Тоа значи дека ако сериозно знаете дека правите нешто добро за земјата и граѓаните, тогаш треба да донесувате одлуки, иако населението не ги поддржува и не треба да се мисли на својата кариера “, објасни тој.
За бугарското вето и за односите со Бугарија Заев вели дека по 22 декември очекува промена на ставот на Софија.
„Ги продолжуваме разговорите со нашите соседи, се нарекуваме пријатели и браќа, а понекогаш и браќата се караат. Сметаме дека сме многу блиску до решение во нашите дискусии. Но, прво, на Бугарија и е потребна избрана влада за да има храброст да носи одлуки.
Бугарија очигледно не е целосно задоволна од спроведувањето на договорот за меѓусебно пријателство од 2017 година.
Но, мислам дека пред Божиќ, односно на Советот на ЕУ на 22 декември, ќе биде можно зелено светло да ги започне пристапните преговори. Бидејќи Бугарија ќе избере нов парламент на 14 ноември, а вториот круг од претседателските избори ќе се одржи една недела подоцна. Така, имате повеќе од еден месец да донесете одлука“.
