Тешка навреда од говорницата на Советот на Град Скопје се слушна од устата на заменик-градоначалникот Александар Трајановски, кој приватните автобуски превозници што девет дена протестираа со блокирање на улиците на главниот град ги нарече „багра“!
„Кого треба ние да платиме за да врши јавна услуга? Ние сме заложници на 40 автобуси? На баграта на Ленин (Јовановски, директор на „Слобода превоз“ – н.з.)? Не ве разбирам, кого застапувате?“, праша Трајановски, на што реагираше Страшо Ангеловски, лидер на МААК и советник од коалицијата „Обнова на Македонија“.
„Тие луѓе не се багра. Ако се за вас багра, за нас се тоа луѓе, граѓани на град Скопје, трудољубиви и луѓе кои си ги бараат своите права и јас овде барам јавно извинување“, рече Ангеловски, но Трајановски не чувствувал потреба да се извини.
„Немам потреба да им се извинам на тие луѓе. Тие се претставници на правно лице и застапуваат некого, секогаш доаѓаат со 40 души на состанок. Тоа е позиција за нормални преговори?“, реплицира заменикот на градоначалничката Данела Арсовска.
