Европската комисија може да ги исклучи Унгарија и Словачка од ембаргото за купување руска нафта, кое во моментов е во подготовка, поради стравувањата дека двете земји се зависни од руската нафта, изјавија во понеделникот двајца претставници на ЕУ за Ројтерс.
Комисијата се очекува да ја финализира работата на следниот шести пакет санкции на ЕУ против Русија поради инвазијата на Украина, кој ќе вклучува забрана за купување руска нафта, чиј извоз е главен извор на приходи за Москва.
Унгарија, која е силно зависна од руската нафта, постојано повторува дека нема да поддржи енергетски санкции. Словачка е исто така една од земјите на ЕУ која најмногу се потпира на руските фосилни горива.
За да остане обединет блокот од 27 нации, Комисијата може да им предложи на Словачка и Унгарија „исклучок или долг преоден период“, рече еден од изворите Ројтерс.
Ембаргото за нафта најверојатно ќе биде воведено во фази, најверојатно дури на почетокот на следната година.
Речиси половина од рускиот извоз на сурова нафта и нафтени деривати, кои на Москва и обезбедуваат огромен извор на приходи, оди во Европа.
Земјите на ЕУ ѝ платиле на Русија речиси 20 милијарди евра од 24 февруари, кога ја нападна Украина.
Генерално, ЕУ увезува 26% од увозот на нафта од Русија, но зависноста варира од земја до земја.
