Претседателот на бугарскиот Атлантски клуб и поранешен министер за надворешни работи, Соломон Паси, оценува дека по влезот на Бугарија во НАТО и ЕУ, земјата нема големи цели.
Затоа Паси благонаклоно гледа на идејата на Слави Трифонов за испраќање космонаути во вселената, јавуваат бугарски медиуми.
За време на презентацијата на нацрт-кабинетот на ИТН, Слави Трифонов објави дека еден од приоритетите ќе биде Бугарија да стане членка на Европската вселенска агенција и да испрати маж и жена кои ќе бидат први бугарски астронаути во НАСА.
Паси вели дека ако тие имаат сериозна намера да испратат астронаут во вселената и да изградат бугарска космичка агенција, ова е област каде Атлантикот може сериозно да ги поддржи.
Тој потсети дека токму Атлантик клубот го напишал првиот закон за вселенските индустрии во Бугарија.
Во врска со критиките и исмејувањата на идејата, Паси вели:
„Ако нè исмејуваат, тогаш сме на вистинскиот пат. Светот не го водат потсмевачи, туку го водат лидери”.
Според него, првиот чекор е Бугарија да се приклучи на Европската вселенска агенција.
„Како што бевме шеста најголема вселенска сила во светот во 80-тите години на минатиот век, трет по големина производител на космичка храна во светот, како што сме земја со најмногу астронаути по глава на жител, денес ние сме скоро единствената европска земја што нема право да испраќа астронаутите до Европската вселенска агенција бидејќи не сме ја платиле таксата “, рече Паси.
Бугарски медиуми јавуваат дека 22.000 лица во Бугарија би сакале да станат астронаути.
