Опозициската ВМРО-ДПМНЕ обвинува дека Владата на Ковачевски не ги почитува прописите кои ги пропишува и додека замрзува цени на лебот, набавува леб по цени од 30 до 100 насто повисоки од 33 денари.
„Службата за општи и заеднички работи при Влада во втората половина од минатата година склучила договор за набавка на бел леб по цена од 41,4 денари за 450 грама. Очигледно кога се работи за народните пари власта не знае да штеди и да пресметува па дава и колку што треба и колку што не треба.
Уште поеклатантен е примерот со белиот леб со продолжен рок кој што го плаќа за 75,6 денари за 450 грама“, велат од партијата на Христијан Мицкоски.
Од Владата, како што велат, молчат за ваквите цени. Кога ги трошат народните пари немаат ограничувања. Според кои пресметки на Владата е логично да се набавува леб по овие цени кои се од 30 до 100% повисоки од цените кои ги пропишува Владата?
Зарем Владата набавува леб по цена која ги крши прописите на Владата и со тоа самите стануваат соучесници?, прашуваат од ВМРО-ДПМНЕ.
Оценуваат дека Ковачевски и неговата Влада се клучните одговорни за „лебната криза“ во Македонија, бидејќи со своите политики доведоа до целосен колапс и хаос на пазарот, којшто граѓаните го плаќаат.
„Токму народот со оваа Влада доживува највисока инфлација на цените, особено на прехранбените и основните производи, доживува празни рафтови, доживува беспарица и други дежа ву состојби од транзицијата.
Ова мора да престане. Оваа криминална и неспособна власт на ДУИ поддржана од СДС мора да замине“, велат од ВМРО-ДПМНЕ.
