Пукањето во тетовската болница покажа само колку власта нема контрола над ништо, и колку е нарушен и девастиран системот, велат од ВМРО-ДПМНЕ.



Пукањето што на 11 јануари се случи пред Ургентниот центар во Клиничката болница во Тетово нема поврзаност со здравство во ниту една точка, изјави вечара, министерот за здравство Фатмир Меџити. Тој вели дека станува збор за нерешени проблеми меѓу две групи кои случајно се нашле во дворот на болницата. Во пукањето, две лица беа ранети.

“Срамно е правдањето на министерот. Живееме во мафијашка држава. И второстепено е прашањето дали има поврзаност со состојбите во здравството.

Не знаеме што е потрагично да има или да нема, а министерот да чувствува дека треба да се правда дека нема врска со здравството, тоа значи дека сепак некој му кажал дека здравството е на колена и дека ваква катастрофа немало од 90-та до денес.

Европската коалиција на СДС – ДУИ- Алијанса оствари уште еден бенчмарк на патот кон ЕУ, се исполни поглавјето за пукање во болница, и ние сме во очекување на некое следно нивно постигнување.

Нема криминална сцена која не се случила со нив, и да има ќе се случи, зошто никогаш не било полошо, и затоа важно е да ги поразиме“ – стои во реакцијата од ВМРО-ДПМНЕ