За зголемување на платите во ФЗО, ќе требало да се скрати на здравствени услуги за граѓаните и на лекови оти немало пари. Од министерството за финансии тврдат дека само минатата година платите во ФЗО скокнале за 25 проценти и дека вработените во Фондот имале поголеми плати од вработените во министерствата.
– Поради фискалните импликации врз Буџетот на Фондот, Владата на РСМ му препорача на Управниот Одбор на ФЗОМ, донесената Одлука за зголемување на вредноста на бодот да има одложено дејство во 2025 година, од причина што за зголемување на платите во ФЗОМ не се предвидени средства во Буџетот за 2024 година. Обезбедувањето на средствата би било возможно само со пренамена од други расходни ставки, а тоа би значело дека за зголемување на платите на вработените ќе треба да се скратат средства за лекови и здравствени услуги за граѓаните, велат од Владата.
Утре вработените во Фондот за здравство стапуваат во штрајк поради намалените плати и ќе ги работат само итните случаи за малолетници, за лекување во странство или за хоспитализирани пациенти.
Според синдикатот, една четвртина од вработените земаат плата пониска од минималната, а друга четвртина минимална плата.
