Осминафиналето најверојатно ќе биде последната етапа од настапот на ракометарите на Вардар во Лигата на шампионите сезонава по убедливиот пораз од 30:22 против Веспрем во Скопје, па реваншот во Унгарија се чини дека ќе биде само формалност.
Двократниот европски првак подобро го отвори натпреварот и по 20 минути игра водеше со 9:7, но гостите ги консолидираа редовите и на одморот заминаа со предност од 15:11, и покрај расположениот Филип Талески, кој првото полувреме го заврши со ефект 6/8.
На средина од вториот дел веќе беше 23:13 за Веспрем и тука заврши приказната и околу победникот, а по сè изгледа и околу патникот во четвртфиналето.
Талески остана на шесте гола од првите 30 минути, а толку пати противничката мрежа ја погоди и Тимур Дибиров.
