Кој постојано го злоупотребува системот, лекарите или оние кои доаѓаат преку врски?! Пациентите со денови чекаат некој специјалист да им ги прочита снимките од магнетна резонанца или томографија, а тешко оди и закажувањето на термини за снимање. На крај починуваат, и никому ништо. За министерот и за директорката на Институтот нема дилема кој е виновен за таквата состојба. Министерот за здравство, Фатмир Меџити најави денеска дека строго ќе се надгледуваат сите лекари кои издаваат упати и закажуваат термини на пациенти за магнетна резонанца, бидејќи како што вели, оваа постапка се злоупотребува.
– Заедно со директорите на Радиологија, ќе ги заостриме критериуми, работиме во оваа насока како и во сите други насоки. Тоа што ви кажав на почеток дека веќе работиме навистина интензивно и тоа ќе биде новитет и реалност, таа централизација на радиологија што ја кажавме, но, навистина ни треба време за овие работи. Повторно апелирам до граѓаните да не кажуваат на докторите навистина и тие да сочувствуваат со нас, да знаат точно дека сепак, докторите одлучуваат кој има потреба, а кој не (за магнетна резонанца) – рече Меџити.
На скопскиот Институт за радиологија пациенти со снимки од магнетна резонанца и компјутерска томографија се пожалија дека со денови чекаат лекарите да им ги прочитаат резултатите, а системот „Мој термин“ покажува дека тешко се доаѓа до термин за снимање и до специјалист.
Директорка на ЈЗУ Институт за радиологија Гордана Антулеска- Белческа рече дека мора да се прави селекција на пациентите.
– Ова е многу интересна и премногу барана, дури и злоупотребена метода. Мислам дека е тука основниот проблем. Треба да се прави правилна тријажа на пациентите, значи да се утврди кој пациент е итен за магнетна, нему да му дадеме предност. Заради тоа апелирам и кон своите колеги, да направиме правилна тријажа, со цел да им дадеме предност на оние, на кои навистина магнетната резонанца им е неопходна. Во тој случај, ние би биле и далеку поефикасни – вели директорката Антулеска-Белческа.
