Украинскиот оператор за гасен систем ГТСОУ денеска соопшти дека ќе прогласи „виша сила“ при транспортот на рускиот гас преку влезната точка Сохранивка, со прекин на протекот на 11 мај.
Украина продолжи да биде главната транзитна рута за рускиот гас до Европа дури и по руската инвазија на земјата на 24 февруари, вели Ројтерс.
ГТСОУ соопшти дека не може да ги врши операциите на гасната компресорска станица Новопсков на локацијата поради „мешање на окупаторските сили во техничките процеси“.
Со оглед на тоа што персоналот на ОГСТУ „не може да врши оперативна и технолошка контрола“ над приклучната точка Сохранивка и компресорската станица Новопсков, компанијата не може да продолжи да ги исполнува своите обврски од договорот.
Компресорската станица Новопсков во областа Луганск во источна Украина беше окупирана од руските сили и сепаратистичките борци веднаш по почетокот на инвазијата.
Тоа е првиот компресор во украинскиот транзитен систем за гас во регионот Луганск, транзитна рута за околу 32,6 милиони кубни метри гас дневно, или третина од рускиот гас што оди во Европа преку Украина, соопшти ГТСОУ.
„За целосно исполнување на своите транзитни обврски кон европските партнери и следејќи ги условите од договорот, можно е недостапниот капацитет од физичката интерконекциска точка Сохранивка привремено да се префрли кон физичката интерконективна точка Суџа лоцирана на територијата контролирана од Украина“, се вели во соопштението на ГТСОУ.
Рускиот гасен конгломерат Газпром не добил потврда за виша сила или какви било пречки за продолжување на транзитот на гас преку станицата во Луганск, соопшти денеска компанијата.
