Пари, лекари специјалисти и опрема, хронично недостигаат во македонскиот здравствен систем. Пациентите се жалат дека со месеци чекаат за термин за одредени специјалистички прегледи. Лекарите, пак, бараат да се вработат нови колеги за навреме да ја пружат потребната нега на пациентите.
Ако веќе имате закажан термин за специјалистички преглед ќе завршите работа навреме. Но, проблемот е да дојдете до закажување на термин за специјалистички преглед, велат пациентите кои ги сретнавме во скопскиот клинички центар Мајка Тереза.
Пензионерката Виолета Петрова од Штип вели дека не и пречи гужвата во скопската клиника, но проблем ѝ е што нема редовно слободни термини за специјалистички прегледи.
Таа вели дека во родниот град не може да ги направи сите прегледи кои ѝ се потребни за нејзината здравствена состојба, затоа што нема доволно лекари специјалисти во Клиничката болница во Штип, па затоа неколку пати во месецот мора да доаѓа до главниот град и лекот да си го бара во Клиничкиот центар Мајка Тереза. На Петрова овој пат ѝ бил потребен преглед на неврологија, но за термин чекала долго време.
„Е сега малку е проблем со закажувањето ако не го фатиш моментот кога треба да се закаже термин, требало до 25-ти во месецот кога се ослободувале термините, а јас и не знам кога ги ослободуваат термините, тоа матичните и специјалистите знаат, треба да реагираш на време, а така има термини ако тие денови ги фатиш“, вели таа.
Петрова објаснува дека во Штип, сликата е слична кога станува збор за едноставни прегледи. Ем се чека за одредени анализи, ем не се целосни, па за да добие конкретна дијагноза мора повторно да доаѓа до Скопје.
„И таму е проблем со прегледи специјалистички, и со термини, тука на пример наместо во два дена во еден завршив работа, ме примија со упат за снимање кој ми беше за наредниот ден и тоа пријатно ме изненади, за да не доаѓам два дена. Така што во овие пандемиски услови можеби и нормално е, не знам. Можеби треба да се направи некоја реорганизација со тие термини и да се вработи повеќе персонал“, вели таа.
Целата сторија на Радио Слободна Европа. 
