Пратеникот во норвешкиот парламент Кристијан Тибринг-Геде го номинираше генералниот секретар на НАТО, Јенс Столтенберг, за Нобеловата награда за мир.
„Столтенберг заслужува награда за неговата извонредна работа како генерален секретар на НАТО во тешко време за алијансата“, е аргументот на предлагачот.
Тибринг-Геде истовремено како една од причините за својот предлог ја посочи „способноста на генералниот секретар на НАТО да обезбеди поддршка за Украина без директно влегување на Алијансата во конфликтот“.
Покрај тоа, парламентарецот ја истакна улогата на Столтенберг во олеснувањето на влезот на Шведска и на Финска во Северноатлантската алијанса.
Претходно беше објавено дека турскиот претседател Реџеп Таип Ердоган е номиниран за Нобеловата награда за мир за неговите напори за решавање на кризата во Украина. Ова го изјави авторот на иницијативата, претседателот на турскиот парламент, Мустафа Шентоп.
