Македонија со сите свои недостатоци во поглед на реформи и политики сепак споредено со други држави кои веќе се членки на Европската Унија, заслужува напредок кон остварување на оваа неспорна стратешка цел членство во Европската Унија, изјавил на средбата лидерот на ВМРО-ДПМНЕ Мицкоски со шефот на унгарската дипломатија Петер Сјарто.
На средбата присуствувале и потпретседателите на ВМРО-ДПМНЕ Владо Мисајловски и Тимчо Муцунски, соопштија од ВМРО-ДПМНЕ.
Мицкоски посочи дека Македонија е предолго надвор од ЕУ, меѓудругото и поради неразумни билатерални пречки со што сериозно се разнишува и кредибилноста на самиот интегрирачки процес и со право се зголемува чувството за двојни аршини кога станува збор за стратешките евроинтегративни процеси.
Се разговарало и за предизвиците со кои се соочуваат граѓаните на Македонија како што се економската криза, растечката сиромаштија, скапите цени и инфлацијата како и недостатокот на инвестиции и реформи.
Двајцата соговорници ги потврдиле исклучително добрите односи кои ВМРО-ДПМНЕ ги има со унгарската Влада и Мицкоски се заблагодари на поддршката која Македонија ја има од пријателска Унгарија.
