„Граѓаните денеска со страв ќе влегуваат во продавниците. Стравот е од тоа какви зголемени цени ќе ги дочекаат на рафтовите. Уште поголем е стравот дали во своите паричници ќе имаат доволно пари за да ги платат основните продукти. Зошто Владата не ги продолжи антикризните мерки?“ – прашува весникот „Скопско ехо“ во својата редакциска статија со наслов „Како му помага Владата на населението да се справи со ценовните удари?“
„Скопско ехо“ пишува: „Бранот на поскапувањата се случува откако денеска престанаа да важат антикризните мерки, кои ги воведе Владата во изминативе три месеци. Со нив од пет на нула проценти се намали данокот на додадена вредност за основните животни намирници – лебот, брашното, млекото, маслото, оризот, јајцата… а од 18 на 10 проценти кај горивата. Тоа сега заврши. Заврши и важењето на ограничените маржи, кои ги наплатуваат трговците на производите.“
„Кој не е исплашен во оваа ситуација? Кој реагира релативно спокојно? Одговорот на овие прашања може да се претпоставува. А зошто Владата не ги продолжи мерките?“
„Сериозноста на ситуацијата бараше надлежните органи барем посоодветно да им објаснат на граѓаните, што може да очекува во иднина. Ќе има нови мерки или…? Вчера имаше и владина седница: расправаа ли за состојбата што ќе настане од денеска?“
„Дали се сите зголемувања на цените поради војната во Украина и нарушувањето на светскиот пазар, или има причини и во лошата поставеност на економијата, на земјоделството, енергетиката… во Македонија? Дали бараат решение за нерационалното трошење на државниот буџет?“
