Шпанија бара баскискиот, каталонскиот и галицискиот да бидат официјални јазици во ЕУ
Шпанското Министерство за надворешни работи испрати барање до Брисел со барање каталонскиот, баскискиот и галицискиот да бидат признати како официјални јазици на Европската унија, пишува Politico.
Шпанскиот министер за надворешни работи Хозе Мануел Албарез го упати своето писмо до ротирачкото претседателство на Советот на Европската унија и до генералниот секретар на телото, Тереза Бланше, тврдејќи дека овие јазици имаат официјален статус во Шпанија и затоа треба да се додадат на 24-те официјални јазици во Унијата.
Албарез инсистира Советот за општи работи да го преземе шпанското барање кога ќе се состане на 19 септември.
Политико коментира дека ненадејниот притисок баскискиот, каталонскиот и галицискиот да бидат признати како официјални јазици во Брисел е поврзан со желбата на премиерот – социјалистот Педро Санчез – да им угоди на каталонските сепаратисти, чија поддршка му е потребна за мирно владеење со земјата.
Но, да се натера ЕУ да ги признае баскискиот, каталонскиот и галицискиот како официјални јазици е полесно да се каже отколку да се направи.
Признавањето на трите јазици како официјални во ЕУ може да потрае со години, како што беше случајот со ирскиот. Даблин поднесе барање до ЕУ ирскиот да стане официјален јазик уште во 2007 година, но тој почна да го ужива овој статус дури во 2022 година, бидејќи дотогаш немаше квалификувани преведувачи.
Регулативата што го регулира јазичниот режим во ЕУ датира од 1958 година и редовно се менуваше за време на проширувањето на заедницата. Првично, официјалните јазици беа четири – холандски, француски, германски и италијански.
Денес се 24 јазици. За да се додадат каталонскиот, баскискиот и галицискиот, оваа промена мора да биде изгласана едногласно од земјите-членки.
