Русија вчера објави дека ги намалува дипломатските односи со Естонија, членката на НАТО, обвинувајќи ја за „тотална русофобија”, а Талин одговори во иста мера и му наредба на рускиот амбасадор да ја напушти земјата.
Трите балтички држави Естонија, Литванија и Летонија се меѓу членките на НАТО кои силно се залагаат за испраќање на германските тенкови Леопард 2 во Украина како клучна воена помош во отпорот на руската инвазија.
Руското Министерство за надворешни работи соопшти дека му наредило на естонскиот амбасадор да ја напушти земјата во февруари и дека двете земји ќе продолжат да бидат дипломатски застапувани од вршител на должноста.
Естонија возврати во иста мера со тоа што му кажа на рускиот амбасадор да го напушти Талин на 7 февруари, рече шефот за надворешни работи Урмас Реинсалу.
„Ќе продолжиме да ја поддржуваме Украина бидејќи Русија планира големи напади и ги повикуваме другите земји да ја зголемат помошта за Украина“, рече Реинсалу.
Естонија им се придружи на другите западни земји минатата недела во испраќањето оружје во Украина.
Москва ја објасни својата одлука за протерување на естонскиот амбасадор како одговор на одлуката на естонската влада да го намали бројот на руски дипломати во Талин.
„Во последните години, естонското раководство намерно го уништуваше целиот спектар на односи со Русија. Официјален Талин со својата државна политика предизвика целосна русофобија“, тврди Москва.
„Естонскиот режим го доби она што го заслужува“, изјави портпаролката на руското Министерство за надворешни работи, Марија Захарова.
На 11 јануари Естонија ја повика Русија да го намали бројот на своите дипломати во Талин на осум лица, што одговара на бројот на естонски дипломати во Москва.
Откако Украина ги обвини руските воени сили за убиства на цивили во градот Буча, во април соседна Литванија го протера рускиот дипломат и го спушти дипломатското ниво на вршител на должноста.
