Во периодот од 13 до 13:30 часот, дел од вработените во Градската општа болница „8 Септември“ во Скопје денеска ќе одржат предупредувачки протест.
Јануарските плати на вработените во здравството доцнат поради хакираниот систем на Фондот. ИТ-системот на ФЗО прекина со работа на 6 февруари откако беше цел на сајбер-напад.
Претставници на синдикални организации на вработени во здравствениот сектор денеска пред ФЗОМ ќе побараат исплата на платите за јануари и ќе информираат за следните чекори доколку не ги добијат парите во текот на денов.
Најави за протест има од докторите, сестрите, болничарите и останатиот медицински кадар од Клиничкиот центар „Мајка Тереза“, како и од други здравствени организации низ земјава.
ФЗОМ во четвртокот побара сите јавни здравствени установи да достават податоци за вработените за да може да им се исплати плата.
Министерот за финансии Фатмир Бесими најави дека доколку до понеделник не се реши проблемот, платите за здравствениот кадар ќе се обезбедат од Централниот трезор, а потоа ќе се порамнат со трезорот на Фондот за здравствено осигурување.
Уверување дека ќе биде надминат проблемот со хакерскиот напад на Фондот за здравствено осигурување, даде и премиерот Димитар Ковачевски, во интервју за МИА.
„Јас го разбирам револтот на здравствените работници. Прво, имаше информации дека немало пари во Буџетот. Пари во Буџетот има и во Фондот за здравство и во централниот буџет, меѓутоа со оглед на начинот на којшто се исплаќаат платите и со оглед на сајбер нападот што се случува, тоа не беше возможно да се направи во изминатите денови. Ние работевме заедно со Министерството за финансии и со вработените во трезорот тоа да може да се направи од централниот трезор што е комплицирана работа, меѓутоа на која што се работи, изјави Ковачевски.
