Денеска во Солун без предходна конкретна најава со цел да се избегне притисок за членовите се одржал првиот состанок на Заедничкиот интердисциплинарен комитет на експерти (ЗИКЕ) меѓу Македонија и Грција за историски, археолошки и образовни прашања.
На средбата одржана денеска, усвоени се Деловникот за работа и динамиката на идните средби, соопшти македонското МНР.
“Состанокот се одржа во пријателска атмосфера, во согласност со духот и принципите на Спогодбата од Преспа. Двете страни го усвоија Деловникот за работа на ЗИКЕ и се согласија за динамиката на идните состаноци. Согласно членот 8 од Спогодбата од Преспа, беше донесена заедничка одлука да се работи на отстранување на одредени референци во учебниците, коишто беа присутни во минатото”, стои во соопштението.
Членови на Заедничкиот интердисциплинарен комитет од македонска страна, покрај амбасадорот Габер се професорите Далибор Јовановски, Никос Чаусидис, Људмил Спасов, Ана Чупеска-Станишковска, Фахри Рамадани и Кица Колбе.
Од грчка страна комитетот го предводи заменик министерот за надворешни работи, Маркос Боларис. Членовите се во најголем дел професори од Универзитетот „Аристотел“ во Солун Спиридон Сфетас, Јаковос Михаилидис и Атанасиос Лупа од Катедрата за историја археологија. Професорот Николаос Заикос е од катедрата за балкански,словенски и источни студии на солунскиот Универзитет „Македониа“.
Други членови се професорката Александра Јоаниду од катедрата за руски јазик и филологија и словенски студии на атинскиот универзитет „Каподистриан“ и Ефтимиос Харлавтис, од директоратот за земјите од Југоисточна Европа при грчкото МНР.
