Премиерот Зоран Заев користи денови од годишниот одмор до 12 август, но е во постојана телефонска и интернет координација со сите ресорни министерства и надлежни институции, соопштија од Владата. На одмор се и дел од министрите.
Медиуми претходно бараа информација од Владата за одморот на премиерот со оглед на тоа што тој не се појави во јавност од Илинден.
„Во периодот од 3 до 12 август дел од членовите на Владата ќе искористат денови од годишен одмор. Владата секојдневно ги извршува сите свои функции, а согласно состојбата со пожарите министрите секојдневно заседаваат и одржуваат седници преку онлајн видео конференциска врска и навремено и непречено ги носат сите потребни одлуки.
Согласно меѓусебна координација, дел од министрите нема да користат денови од годишен одмор во овој период, а со цел да се обезбеди и теренска и канцелариска координација на активностите секогаш и секаде каде што тоа е потребно“, велат од Владата.
Околу драматичната ситуација со пожарите во Македонија, од Владата велат дека овие денови теренската координација е обезбедена од страна на првиот вицепремиер Артан Груби, министерката за одбрана Радмила Шекеринска, министерот за транспорт и врски Благој Бочварски, министерот за земјоделство Арjанит Хоџа, министерот и заменик министерот за информатичко општество и администрација Шакири и Бајдевски, министерката и заменик министерот за образование Царовска и Шабани, заменик министерот за внатрешни работи Буши, заменичката министерка за животна средина Оџаклиеска, заменикот министер за труд и социјала Енвер Хусин, заменикот министер за здравство Илир Хасани, заменик министерот за правда Нухиу.
Според тоа кој е на работа, од соопштението произлегува дека на одмор се и министрите Оливер Спасовски, Венко Филипче и Бојан Маричиќ, пишува СДК.
