Украинското министерство за надворешни работи ја критикуваше ТВ-мрежата Ејч-Би-О затоа што во новата сезона на хит-серијата „Белиот лотус“ ќе глуми и познаиот српскиот актер Милош Биковиќ, кој отворено ја поддржува руската инвазија на Украина.
Биковиќ доби руско државјанство во 2021, а Владимир Путин му го додели медалот „Пушкин“ за неговиот придонес кон руските култура и уметност. Во 2019 тој кажа дека му бил забранет влез во Украина од безбедносни причини.
„Милош Биковиќ, српскиот актер кој ја поддржува Русија од почетокот на инвазијата, сега ќе биде ѕвезда на третата сезона на ‘Белиот лотус‘. Би го прашале Ејч-Би-О дали е во ред за нив да работат со личност која поддржува геноцид и кршење на меѓународното право“, напиша украинското министерство за надворешни работи на социјалните мрежи.
Во објавата има и снимки на Биковиќ со разни реплики во филмови, изјави за Русија, како и награди што ги добивал во Србија и Русија.
Биковиќ има играно во бројни руски продукции, вклучувајќи го и филмот кој се снимаше во вселената. Киев кажа дека тој снимал филмови и на анектираниот полуостров Крим.
Снимањето на третата сезона на „Белиот лотус“ ќе почне во февруари, ќе се случува во Тајланд, а премиерата ќе биде во 2025.
