Присуството на премиерот Зоран Заев (со сопругата Зорица) на трибините на Националната арена во Букурешт не им донесе среќа на фудбалските репрезентативци на Македонија, кои загубија со 3:1 од Австрија во дебито на Европското првенство.
Претходно, Заев беше сведок на поразите и на ракометните, и на одбојкарските репрезентативци на големите натпреварувања.
Македонските ракометари на ЕП 2018 во Хрватска триумфираа во групата во Загреб со победите над Словенија и Црна Гора и ремито со Германија, по што претседателот на Владата дојде да ги бодри во главната фаза во Вараждин, во која „црвено-жолтите“ ги загубија сите три средби – со Шпанија, Чешка и Данска.
Конечно, минатиот викенд Заев навиваше и за одбојкарската селекција на Македонија во финалето на Европската сребрена лига во салата „Парк“ во Струмица, во која избраниците на селекторот Никола Матијашевиќ беа поразени од Данска и по четврти пат останаа без златен медал во ова натпреварување.
