Бројката е ирелевантна и реално е да се очекува зголемување на бројот на случаи на пертусис овие денови и недели, па затоа и Комисијата се одлучи за превентивни мерки, мислам навремени, со цел да спречиме огромно зголемување кое може да биде сериозно и да донесе проблеми какви што ги гледаме во околните земји, изјави проф. д-р Александар Петличковски, претседател на Комисијата за заразни болести, во денешната „Топ тема“ на ТВ Телма. Бројот на случаи со пертусис, сметајчи ги и денешните четири нови случаи, се искачи на вкупно 26 во земјава.
- „Најголем дел од заболените лица се невакцинирани деца, но меѓу потврдените случаи има и вакцинирани. Има и некомплетно вакцинирани. Бајголем дел се деца до петгодишна возраст, но потврдени случаи има и кај родени во 1979 година, во 1973 година“, изјави проф. д-р Петличковски.
Моментално, како што додаде, нема информации дека некој од згрижените пациенти е во потешка состојба.
- „Најголем дел од нив се дијагностицираат и се испраќаат на домашно лекување“, рече првиот човек на Комисијата за заразни болести.
Првиот пријавен случај е на 5-ти јануари 2024 година, а само во последните 7 дена се пријавени 11 случаи или половина од досега регистрираните случаи. Во однос на вакциналниот статус, 18 лица од заболените не се вакцинирани или се некомплетно вакцинирани согласно возраста и Календарот за имунизација. Два случаи се комплетно вакцинирани за возраста, за два случаи вакциналниот статус е непознат. Од заболените, 16 лица биле хоспитализирани и тоа 14 од нив се на возраст до 4 години.
