Сметката за обнова на Украина порасна на 411 милијарди долари, според новата проценка спроведена заеднички од владата на земјата, Светската банка, Европската комисија и Обединетите нации.
Според проценката, на Киев ќе му бидат потребни 14 милијарди долари само оваа година за најкритичните и најприоритетни инвестиции за реконструкција. Проценетите трошоци значат дека Владата во Киев ќе има потреба од 11 милијарди американски долари надворешно финансирање над сумата што е веќе доделена за овие задачи во годишниот буџет.
„Енергетската инфраструктура, домувањето, критичната инфраструктура, економијата и хуманитарното деминирање се нашите пет приоритети за оваа година“, изјави украинскиот премиер Денис Шмигал.
Новата евалуација претставува зголемување од 60 милијарди долари во споредба со претходната проценка, која групата ја објави минатиот септември. Тогаш, проценетите трошоци за наплата и поправка изнесуваа 349 милијарди долари. Бројките укажуваат дека најголемиот дел од штетата на земјата е нанесена во првите шест месеци од тековниот конфликт со Русија, кој почна кон крајот на февруари 2022 година.
Според Шмигал, „износот на штетата и потребите за обновување во моментов не ги вклучува податоците за загубата на инфраструктурата, домувањето и бизнисите во окупираните територии“.
