Израел го одложи за неколку дена планираниот упад во Појасот Газа, под контрола на Хамас, поради лошите временски услови, се наведува во извештајот на Њујорк Тајмс (NYT) објавен доцна синоќа.
Копнената офанзива требаше да започне овој викенд, но делумно беше одложена поради облачното небо што би им отежнало на израелските пилоти и оператори на беспилотни летала да обезбедат воздушна поддршка за копнените сили, објави Њујорк Тајмс, цитирајќи тројца неименувани високи израелски офицери. .
Израелската војска синоќа соопшти дека подготовките за „интегриран и координиран напад од воздух, море и копно“ на Појасот Газа се при крај.
Целта на Израел е да го избрише политичкото и военото раководство на исламистичката организација Хамас, која истрела илјадници ракети врз Израел додека стотици негови војници ја пробија границата во невиден ненадеен напад минатиот викенд, во кој загинаа повеќе од 1.300 луѓе.
Израел одговори со одмазднички воздушни напади врз крајбрежната енклава во кои досега загинаа повеќе од 2.300 луѓе.
Тајмс пишува дека копнената операција би можела да го вовлече Израел во повеќемесечна урбана војна.
Иран во саботата во објава на социјалните мрежи предупреди дека ситуацијата би можела да излезе од контрола со „далекосежни последици“ доколку не бидат запрени „воените злосторства и геноцидот“ на Израел. Се верува дека десетици илјади борци на Хамас се кријат во бункери и стотици километри подземни тунели во северниот дел на Појасот Газа, според извештајот на NYT.
Израелската војска очекува Хамас да се обиде да го спречи нивното напредување со минирање на тунели додека се приближуваат копнените сили, се вели во извештајот. Хамас, исто така, планира да нападне зад израелските линии користејќи комплексен тунелен систем, објави Тајмс, додавајќи дека стратешката дилема е дека силите на организацијата можат да бидат особено ефикасни со криење на заложниците под земја.
Во израелската офанзива се очекува да учествуваат пешадиски единици, како и тенкови и инженерија, пишува американскиот весник, повикувајќи се на официјални претставници. Се очекува копнените сили да добијат заштита од борбени авиони, хеликоптери, беспилотни летала и артилерија од копно и од море, пренесе Индекс.хр.
