„Доколку пожарникари обезбедуваат училишта, не може да се оствари брза интервенција на Противпожарната бригада (ППБ) на Градот Скопје.
Со тоа ќе се загрози безбедноста на граѓаните од пожари, поплави и други евентуални непогоди каде пожарникарите имаат законски овластувања да постапуваат и реагираат, вели професор д-р Марјан Ѓуровски од Институтот за безбедност одбрана и мир при Филозофскиот факултет за идејата пожарникари да ги обезбедуваат средните училишта во Скопје.
Секое ангажирање на Противпожарната бригада на Град Скопје на задачи надвор од законот и нејзината надлежност го доведува во опасност главниот град на државата и ќе ја загрози основната заштита од пожари.
Професорот прашува “согласно кој закон тие имаат надлежност да обезбедуваат објекти, имоти и лица, а најмалку пак ученици и како ќе користат методи, опрема и други средства за обезбедување кога за тоа немаат законски овластувања“?
„Градот Скопје има 23 средни училишта, а во смена во ППБ на град Скопје се 36 пожарникари, односно вкупниот ППБ на Град Скопје вкупно брои 192 припадници.
Секое механичко играње со бројки и нивно прераспоредувале на нови задачи може да го доведе во прашање основното функционирање на градот во заштитата од пожари“, смета Ѓуровски.
