Бројот на луѓе во светот ќе го достигне „пикот“ порано и ќе се намалува побрзо од претходно предвиденото, а „демографската бомба“ од која многумина стравуваа нема да пукне.
Ова го покажуваат податоците од новиот извештај цитиран од „Гардијан“.
Студијата, нарачана од Римскиот клуб, предвидува дека, според сегашните трендови, светската популација ќе достигне врв од 8,8 милијарди до средината на векот, а потоа брзо ќе се намалува.
Откако ќе се надмине демографскиот прилив, притисокот врз природата и климата треба да почне да се намалува, како и придружните општествени и политички тензии.
Сепак, авторите предупредуваат дека само намалувањето на наталитетот нема да ги реши еколошките проблеми на планетата, кои се веќе сериозни за 7,8 милијарди луѓе и главно се должат на прекумерната потрошувачка од страна на богатото малцинство.
Намалувањето на населението може да создаде и нови проблеми, како што се намалување на работната сила и поголем товар од здравствената заштита поврзана со стареењето на населението, како што наоѓаат земји како Јапонија и Јужна Кореја.
Претходните студии покажаа помрачна слика. Минатата година, Обединетите нации процениле дека светското население ќе достигне 9,7 милијарди до средината на векот и дека ќе продолжи да расте неколку децении потоа.
