Првомајската парада во Москва нема да се одржи поради зголемената закана од тероризам, најави најголемата синдикална федерација во Русија, додека руските власти постојано предупредуваат на оваа закана во контекст на конфликтот во Украина.
„Во главниот град нема да има паради или собири, планирана е само свечена седница“, изјави потпретседателот на Руската федерација на независни синдикати Александар Черчуков, пренесува руската прорежимска новинска агенција ТАСС.
„Одлуката беше донесена од властите бидејќи нивото на терористичка закана е зголемено, дури и во областите далеку од местото на специјалната воена операција“, рече тој, користејќи го еуфемизмот на Кремљ за инвазијата на Украина.
Неколку дена по Меѓународниот ден на трудот, Русите го слават 9 мај, денот на победата над нацистичка Германија, со воени паради низ целата земја, од кои најголемата се одржува на Црвениот плоштад во присуство на претседателот Владимир Путин.
