По информацијата дека денеска Кривичниот суд ќе одлучува дали Сашо Мијалков ќе излезе од притвор, поради понудена милионска гаранција, од Обвинителството и официјално потврдиле дека дале согласност да се брани од слобода, бидејќи понудил гаранција од речиси 11 милиони евра.
„Обвинителството ценејќи ги околностите и имајќи ги предвид наводите во предлогот и дополненијата за укинување на мерката притвор и нејзина замена со мерка гаранција, ценеше дека висината на понудената гаранција во доставените предлози во вкупен износ од 10.871.170 евра е прифатлива за обвинителството за обезбедување на присуство на обвинетиот до правосилноста на пресудата“, изјавиле за „Фокус“ од Обвинителството за гонење на организиран криминал и корупција.
Во изминатиов период, додека е во притвор Мијалков, за него беа донесени две првостепени пресуди. За предметот „Таргет Тврдина“ кој се однесува на незаконскато масовно прислушување доби 12-годишна затворска казна, додека за случајот „Трезор“ кој се однесува на нелегална набавка на софтвер за следење на комуникации, судот му одреди 8 години затвор. Наскоро се очекува и уште една пресуда за случајот „Тортура“, кој се однесува на апсењето на поранешниот функционер Љубе Бошковски.
Ако гаранцијата биде и формално прифатена и потврдена, тоа значи дека Мијалков ќе излезе од притвор и ќе биде на слобода до правосилност на одлуките.
