Ангела Меркел денеска го посети поранешниот нацистички логор во Аушвиц , за прв пат во својство на канцелар каде изјави дека признавањето на нацистички злосторства е клучен дел од идентитетот на Германија која мора да се бори против растечкиот антисемитизам.
Претходно, германските канцелари Хелмут Шмит, во 1977 година и Хелмут Кол, во 1989 и 1995 година го посетија овој логор на смртта.
„Сеќавањето на злосторствата … е одговорност што никогаш не завршува“, рече Меркел.
„Да се биде свесен за оваа одговорност е дел од нашиот национален идентитет, нашето саморазбирање како просветлено и слободно општество“, додаде таа.
Меркел го изрази „длабокиот срам“ на Германија за она што се случи во Аушвиц и соседниот логор Биркенау, каде милиони Евреи ги загубија своите животи во периодот меѓу 1940 и 1945 година.
„Се поклонувам со наведната глава пред жртвите на Шоах“, рече таа, зборувајќи пред полскиот премиер Матеуш Моравиески и преживеаниот од кампот, 87-годишниот Богдан Станислав Бартниковски.
65-годишниата канцеларка, која е родена девет години по завршувањето на Втората светска војна, рече дека Аушвиц „бара да ја одржуваме меморијата жива“.
Вкупно, 1,1 милиони луѓе беа убиени во Аушвиц-Биркенау, вклучително и не-еврејски Полјаци, советски воени затвореници, Роми и антинацистички борци.
Многумина беа убиени истиот ден кога пристигнаа во кампот.
Во пресрет на посетата на Меркел, федералната држава во Германија одобри нова донација од 60 милиони американски долари (Фондацијата Аушвиц-Биркенау), за реставрација и заштита на физичките остатоци на кампот, како бараки, кули за надгледување и лични предмети на оние кои умреле таму. Ова се надоврзува на претходната донација на државата од 60 милиони евра, дадена кога фондот беше основан пред една деценија.
