Учениците во Франција нема да можат да поминат низ училишните врати доколку се појават на училиште во абаја изјави вчера претседателот Емануел Макрон.
Тој додаде дека властите ќе бидат „немилосрдни“ во спроведувањето на новата забрана за носење традиционална муслиманска облека.
„Знаеме дека ќе има случаи кога студентите ќе се обидат да го „тестираат правилото““, рече Макрон, според „France 24“
Макрон рече дека „специјален персонал“ ќе биде распореден во „чувствителните“ училишта за да им помогне на директорите и наставниците и да разговара со учениците и семејствата, доколку е потребно.
Одлуката за забрана за носење абаја минатата недела ја донесе министерот за образование на Франција, Габриел Атал.
„Одлучив дека повеќе нема да може да се носи абаја во училиштата. Кога ќе влезете во училница, не треба да знаете на која религија припаѓа ученикот само со тоа што ќе погледнете во една од нив“, рече Атал.
Во Франција, во 2004 година, носењето шамии беше забрането во училиштата, додека во 2010 година беше воведена забрана за носење вел на јавно место, што доведе до незадоволство кај петмилионската муслиманска заедница во Франција.
Според британската агенција Ројтерс, Франција воведе строга забрана за истакнување на верската припадност во државните училишта откако законите донесени во 19 век го отстранија традиционалното католичко влијание од јавното образование и оттогаш земјата се бори да ги ажурира правните упатства за адекватно тоа одговори на растот на муслиманското малцинство.
Сите политички партии се обединети во одбраната на секуларизмот во Франција и се обидуваат да ја зауздаат растечката улога на исламот во општеството.
