Владата на денешната седница одлучи да му препорача на Надзорниот одбор на „Пошта на Северна Македонија“ да го отповика Јани Макрадули од функциите претседател на Управниот одбор и генерален директор на ова акционерско друштво.
За нов директор, пак, Владата предлага Надзорниот одбор да го избере Васко Стефанов, кој досега беше заменик-директор на Агенцијата за вработување, од којашто функција денеска е разрешен.
Во „Пошта“ минатата недела вработените почнаа штрајк за зголемување на платите, а истиот ден на средба со Управниот одбор на која присуствуваше и Макрадули тие како понуда добија компромисно решение – наместо покачувањето на платите да биде веднаш, тоа да биде етапно, прво за вработените во технолошкиот процес, а потоа и за администрацијата.
