Проклетството наречено „Европска (сребрена) лига“ продолжи да ја прогонува одбојкарската репрезентација на Македонија, која ни во своето четврто финале не го освои златниот медал, овој пат губејќи од Данска со 3:1, и тоа како домаќин на завршниот турнир во Струмица.
По Словенија, Естонија и Украина, и Данците беа подобри од „црвено-жолтите“ во мечот за трофејот, иако Македонија го доби првиот сет со 25-23.
Новиот шампион убедлив во вториот (25-19), а третиот го извлече со 27-25, откако избраниците на селекторот Никола Матијашевиќ се вратија од -4 и во финишот водеа со 22-20.
Во последниот сет домаќинот пропушти да израмни на 18-18 и тука, всушност, ја потпиша капитулацијата, бидејќи Данците го добија сетот со 25-19 и изборија пласман во Европската златна лига.
Мечот се одигра пред публика по одлуката на Владата да дозволи исполнување на капацитетот на салата „Парк“ до една третина, а меѓу гледачите беа и премиерот Зоран Заев и директорот на Агенцијата за млади и спорт, Наумче Мојсоски.
