Со 711 барања за азил во Европската унија поднесени само во ноември 2023 година, државјаните на Република Македонија се наоѓаат на второто место меѓу шесте земји од Западен Балкан, покажува извештајот на Европската агенција за азил.
Пред нив се само граѓаните на Албанија со 892 барања, а далеку зад нив се тие на Србија со 507 барања, на Косово со 281, на Босна и Херцеговина со 127 и на Црна Гора со 30 барања за азил.
Според извештајот, тенденцијата на сите граѓани од Балканот е да бараат азил во три земји од ЕУ: Франција, Германија и Италија.
Македонските државјани се втори и според бројот на барања за азил што се во обработка, вкупно 2.146. И според овој показател пред нив се само граѓаните на Албанија со 3.278, а далеку зад нив се тие на Србија со 1.250, на Косово со 966, на БиХ со 540 и на Црна Гора со 118.
Сите барања за азил од земјите од Западен Балкан кои се испитуваат во земјите на Унијата се со исклучително ниско ниво на прифаќање, кое не надминува 1 отсто.
Европската агенција за азил соопшти дека во ноември земјите од Европската унија примиле 118.000 барања за азил, а за периодот од јануари до ноември 2023 година барањата достигнаа над 1 милион, ниво што, според Агенцијата, потсетува на бегалската криза од 2015-2016 година.
Во ноември 2023 година Германија ја задржа својата позиција како главна дестинација за баратели на азил во земјите на Европската унија, при што прими речиси една третина од сите барања за азил што беа поднесени во членките на ЕУ.
