„Гласноговорникот“ на бугарската официјална политика кон Македонија, Красимир Каракачанов, со нов сет пораки кон „браќата“ од југозападниот дел на границата.
„Во Скопје некој си вообразува дека Бугарија од братски чувства и солидарност ќе направи отстапки. Очекуваат и некој однадвор да ја притисне Бугарија. Но, тоа нема да се случи“, порача вицепремиерот и министер за одбрана.
„Како тоа си претставувате дека Парламентот би гласал нешто такво и една отстапка од позицијата на Бугарија да помине преку кој и да е парламент. Ќе видиме следната недела што ќе се случи“, се закани тој и предупреди: „Изборот дали ќе бидат дел од ЕУ е нивни. Со коминтерновско удирање по масата нема да влезат во Европската унија“.
Лидерот на софиското ВМРО смета дека Договорот за пријателство, добрососедство и соработка е доволно добар „ако се почитува“. Според него, една година по неговото потпишување тој повеќе не се почитувал.
„Договорот е прв чекор за прием во НАТО. Неговото почитување е вториот чекор за прием во ЕУ“, нагласува Каракачанов.
За разлика од минатата седмица, сега тој тврди дека нема дипломатски притисок врз Бугарија од Германија, а во САД ја објаснил генезата на балканските проблеми, повикувајќи се на американски извори.
„Пријателството си е пријателство, братството си е братство, но договорите и добриот тон треба да се почитуваат. Ние не сакаме да одиме во Капали чаршија за да спориме чиј е Гоце Делчев“, во свој стил нафрли еден од замениците на премиерот Бојко Борисов, инсистирајќи дека Бугарија и бугарскиот народ треба да си го заштитат својот национален интерес.
„Ние не ги тераме Скопје и Македонците да се откажат од својот национален идентитет, туку да бидат така добри да си го создаваат според фактите и од кога е создаден со оган и со меч по 1944 година. Дотогаш историјата е заедничка, на еден народ. Заедничка историја имаме со Османската империја, со Византија, со ерменскиот народ, но не и со Македонците. Едно ‘клекнување’ пред Скопје сега би означувало идни проблеми, вклучително и такви како претензии да се учи измислениот македонски јазик во ќустендилско по некое време“, заклучува Каракачанов.
