Никица Давкова, мајка на малиот генијалец Дамјан Давков кому министерката за образование Мила Царовска одбива да му исплати награда по победата на научен натпревар бара да не се бара алиби за дискриминацијата на нејзиниот син и да му се исплати заслужената награда.
Мајката не се согласува парите да ги даде општина Штип затоа што тоа не е работа на општината туку на министерството што го води Царовска.
“Внимателно го прочитав официјалното соопштение на МОН и јасно беше на што алудира Министерката, што го потврди и на вчерашната емисија на Канал 5.
Вината да се префрли на СММ затоа што дозволиле ученикот да учествува. Не е точно дека на натпреварите за средно може да учествуваат САМО ученици од средно.
Зборот САМО го нема. Јасно е и зошто. Тоа би бил апсурд.
Имено, секој што е во образование знае (би требало да знае) дека како и во спортот, така и во науката никаде во светот не е забрането помал ученик да учествува во категорија со поголеми ученици.
За информација, на Светската олимпијада по математика – ИМО најмладиот учесник знам дека имал 11 години (можеби имало и помал).
На ИМО 2020 Дамјан и уште 2-3 деца со 12 години беа најмалите учесници, а Дамјан е најмалиот учесник од Македонија што учествувал на ИМО. За да биде дел од тимот ученикот треба да ги помине сите натпревари, општински, регионален и државен за учениците од средно образование, како и селекциониот натпревар за Светската олимпијада.
Што се однесува до тоа општината да исплати награда, воопшто нема никаква поврзаност со наградата од Државниот натпревар и затоа нема потреба од такво нешто. Си има кога општината да награди. Не сега, не вака”, пишува мајката на генијалецот кому Царовска му ја скрати наградата затоа што средношколците ги победил како основец.
