Министерството за внатрешни работи на Македонија денеска објави јавен оглас за прием на 600 нови полицајци. Триста полицајци ќе бидат примени во Скопје, 30 во Охрид, во Куманово 15, Штип – 35, Тетово – 20, Битола – 15, Струмица – 40, во Регионален центар за гранични работи Север – 25, во Регионален центар за гранични работи Запад- 20, во Регионален центар за гранични работи Исток – 20, во Регионален центар за гранични работи Југ- 15 и во Оддел за специјални полициски операции – 50 извршители.
Кандидатите треба да се државјани на Македонија со завршено средно образование, да се полнолетни, активно да го користат македонскиот јазик и неговото кирилско писмо, да не се членови на политичка партија или член на органи и тела на политичка партија.
„Кандидатите треба да ги исполнуваат следните општи услови: да е државјанин на Република Северна Македонија, да е полнолетен, а да не наполнил 25 години живот ако за првпат заснова работен однос на работно место во Министерството за кое е предвидено средно образование. Активно да го користи македонскиот јазик и неговото кирилско писмо, со безбедносна проверка да е утврдено дека не постои безбедносен ризик од вработување на кандидатот, да има завршено најмалку четиригодишно средно образование, да е здравствено и психофизички способен, со правосилна пресуда да не му е изречена казна забрана на вршење професија, дејност или должност, да не е член на политичка партија или член на органи и тела на политичка партија и да има положено тест за интегритет“, соопшти МВР.
Кандидатите треба да ги исполнуваат следните посебни услови:потребна телесна висина од најмалку 175 см. (маж), односно 165 см. (жена) и висока лична физичка подготвеност.
