Лицата кои се потпишале за регистрација на партијата откриваат дали Палевски е човек на СДСМ, вели лидерот на ВМРО-ДПМНЕ кој му сугерира на Васко Поппетревски и неговата емисија да ја истражат врската меѓу луѓето што се потпишале на регистрација на партијата Десна.
Индиректно Мицкоски посочува дека зад осомничениот убиец Палевски стои поддршка од кругови во СДСМ.
„Доколку ги следите неговите ставови поврзани со одредени теми и доколку се вратите наназад во неговото минато како претседател на градската организација на СДСМ, јас пак можам да дојдам до поинаков заклучок, дека тој претставува партиско полициска инсталација. Не верува во тоа што го кажува и ги злоупотребува темите за да нанесе политичка штета на ВМРО-ДПМНЕ“, изјави претседателот на ВМРО-ДПМНЕ, Христијан Мицкоски во интервјуто за „360 степени“ на МРТ.
Мицкоски додаде дека Љупчо Палевски Палчо е партиско полициска инсталација која нанесува само штета на ВМРО-ДПМНЕ злоупотребувајќи одредени теми.
„Насилство не е прифатливо за мене и јас секогаш сум кажувал дека насилството не е алатка во политиката која што треба да ја користиме“, појасни Мицкоски кој одговара и за неговата средба со Палевски пред 4 години.
„На таа средба и на средби со многу други личности кои што испраќале политички пораки, моето прашање било зошто и кои се аргументите да ги слушнам. Не сум слушнал аргументи, туку напротив стигна барање ВМРО-ДПМНЕ да помогне во собирање на граѓански потписи за да регистрира лицето политичка партија“, рече претседателот на ВМРО-ДПМНЕ.
Тој посочи дека ВМРО-ДПМНЕ не му помогна во собирање на граѓански потписи за да регистрира политичка партија.
„Нормално дека не. Но три – четири години потоа сведоци сме сите дека тој успеа да регистрира политичка партија под името „Десна“. И сега прашањето е кој му помогна“, праша Мицкоски.
Мицкоски додаде дека јавноста и луѓето кои што се во политиката точно знаат кој му помогна на Љупчо Палевски во собирање на потписи за регистрирање на партија.
„Погледнете ги потписите на лицата кои што се потпишани и ќе го добиете одговорот“, сугерира Мицкоски.
