Издржав прилично клевети изминативе години (и не само јас), со тешки невистини и особено полувистини, кои се најопасни. И заради отпорот против Рудникот на смртта, и заради учеството во протестите против кОвид-дискриминациите. Поточно, не ги издржав, бидејќи не ме допреле суштински, туку само евентуално ми одзеле малку време.
Ова е дел од обраќањето на Крум Велков, еден од луѓето кои водат тешка битка за еколошки, здравствен, демографски и други видови на спас на струмичкиот регион за каде се планира отворање на рудникот Иловица – Штука.
,,Сеедно, имам намера да издржам уште десетпати по толку (вклучително и подмолни инсинуации, што е класична клеветничка методологија), без разлика од која страна, служба, или мрежа да доаѓа, или од која било од разноразните изманипулираните душички вплеткани во тие мрежи, кои најмногу ги жалам, бидејќи таквите се најголеми жртви. Грижата на совеста е опасна работа, мили клеветници, макар и со лажни профили да сте; чувајте се од неа, велат тоа е гласот Божји. Друго, внимавајте на местенки од луѓе кои се инфилтрирале токму со цел да не дискредитираат. Еден таков набркав пред три години, но тие се упорни, бидејќи се по задача.
Значи, Рудникот на смртта ќе го сопреме, макар и последно да ни биде. Таква е решеноста кај сите во Отпорот. Инаку, немам никакви други амбиции, најмалку политички. Кој си има, негов проблем. Кога ќе заврши сето ова со рудникот и со „пландемијата“ едноставно ќе се повлечам и ќе го правам тоа што најмногу го сакам” пишува Велков кој објаснува зошто тој и неговите сомислњници се борат против рудникот.
Владата во 2019г. го раскина договорот за концесија за рудникот Иловица-Штука. Но, Управниот суд пресуди дека имало пропусти во процесот, со што се наметна прашањето за можно отворање на рудникот.
Во пред дваесетина дена групацијата Трафигура која е една од водечките светски, независни трговски, логистички и производни компании во секторот на „commodities“ или природни суровини и производи, најави дека има план да го активира проектот Иловица – Штука преку текст во медиумите.
,,Како мултинационален конгломерат, групацијата има развиена мрежа од свои компании во 48 земји на сите континенти од Земјината топка. Трафигура е и клучен инвеститор во проектната компанија Еуромакс Ресоурцес (регистрирана во Канада и јавно листирана на Берзата во Торонто „TSX”) која повеќе години го развива Проектот за современ рударски комплекс на бакар „Иловица-Штука” во југоисточниот регион на нашата држава”, стои во текст за плановите на компанијата.
Во продолжение сите негативни аспекти на проблемот за кој зборува Велков:
ВИСТИНАТА: КОМПЛЕТНА КОНТАМИНАЦИЈА, БОЛЕСТ И СМРТ
(Информации презентирани на консултативната средба со Владата на РМ во јули 2018 година)
1. Струмичката/регионалната економија е главно заснована на земјоделие, кое генерира далеку поголеми приходи за државата (со потенцијал за уште поголеми), отколку што би давал рудникот: само 2% за државата, а 98% од профитот за странските газди. Тврдењата дека заедно можеле да коегзистираат рударство и земјоделие се смешни и недоветни. Во мигот кога рудникот ќе проработи, конкуренцијата ќе го искористи тоа и за година-две ќе имаме уништена регионална економија, бидејќи никој не сака да јаде затровени производи.
2. Секаде каде што има бакар и злато има и сулфати и тешки метали, од кои најотровни се арсенот, талиумот и кадмиумот. Секаде, без исклучок. Ги нарекуваат „заспаниот ѕвер“. При рударските ископувања, ѕверот се ослободува. При допир со воздух, сулфатите се претвораат во сулфурен оксид, а со вода во сулфурна киселина. Во човечкиот организам, сулфатите исто така се претвораат во сулфурна киселина, со краен исход – смрт. Сулфурниот оксид, арсенот, кадмиумот и талиумот уште при ископувањето се врзуваат со опасните МП 2,5 честички. Тие се распространуваат на огромни растојанија, и до 2.000 км. До сите вас.
3. Во Иловица-Штука ќе се ископуваат 30 милиони тони јаловина годишно, што го прави најголем рудник во Југоисточна Европа. Без исклучок, ќе бидат загадени сите поздемни и надземни води. Ова е листата на отровни елементи кои ќе ги добиеме од работата на рудникот: тешки метали, цинк, алуминиум, арсен, бакар, железо, нитрати, сулфати, комплекси од метали, селен, манган, кадмиум, талиум, жива. Повеќето од овие супстанци остануваат во почвата над 2,000 години. Сите се смртоносни, преку предизвикување канцери и други тешки заболувања, вклучително и деформитети кај новороденчиња.
4. Дневно ќе се ископуваат по 164.000 тони јаловина, што компаративно споредено значи 2.000 тони отровна прашина. Тоа значи 730.000 тони прашина годишно врз Струмичката Котлина. За 15 години, вкупно 10 милиони тони прашина ќе паднат врз нас, доволно за целата Струмичка Котлина да биде покриена со слој отровна прашина дебел 10 см. За 23 години, колку што би работел рудникот, Котлината ќе стане пустелија, со чести кисели дождови. Ова се нарекува комплетна контаминација. Нормален живот во такви услови е невозможен.
5. Неповратно ќе се исечат околу 1,000 хектари шума, со сите ерозивни последици по животната околина, еко-системот, биодиверзитетот и климата.
6. Рудникот ќе го загрози водоснабдувањето на струмичко од браната Турија. Дневните потреби на рудникот изнесуваат 1.700.000 м3 вода, или годишно 630.720.000 м3. Вкупната водозапремнина на Турија изнесува 50.000.000 м3. Браната на хидројаловиштето на рудникот ќе има четири пати поголема запремнина (210 000 000 м3 отров). Турија е изградена да се користи како вода за пиење и наводнување и не е предвидена за потреби на каков било рудник, бидејќи тоа стратегиски би ги загрозило граѓаните. Рудникот нема обезбедено вода за работа и нема начин да обезбеди!
7. Ќе биде изградена најголемата хидројаловишна брана на планетата, висока 276 метри, на средно трусно подрачје, полна со течен отровен отпад. Дамоклов меч и постојан страв од хаварија која би била апокалиптична.
8. Покрај еколошка и економска, рудникот ќе предизвика и културолошка/национална деградација, како резултат на огромен и последен бран иселување, кој ќе уследи штом рудникот ќе проработи. Последици: несогледиви и непоправливи.
