Лидерот на Македонска алијанса за европска интеграција (МАЕИ) и пратеник во албанскиот парламент, Васил Стерјовски, реагираше во врска со одлуката на албанскиот Комитет на експерти за справување со пандемијата, за воведување двонеделен карантин за сите кои доаѓаат од Македонија.

Оваа одлука економски ги погодува жителите кои живеат на албанско-македонската граница од Преспа до Голо Брдо кај Дебар, кои, ползувајќи ја близина на границата со Македонија сопствената и егзистенцијата на нивните семејства ги имаат поврзано со сезонска работа и други активности во пограничните региони на Македонија, наведува тој.

Посочува дека од Преспа, општина Пустец секојдневно во Македонија, влегуваат и излегуваат над 300 жители кои работат сезонски работи во селата на Преспа во Македонија.

За овие жители, приходот обезбеден со сезонска работа во Македонија за неколку месеци, е единствен приход за нивните семејства. Техничкиот комитет на експерти треба што побрзо ова недела да ја ревидира одлуката, бидејќи бројот на заразени лица во Македонија се намалува и не ја оправдува одлуката, изјави Стерјовски.

Донесената одлука на комитетот, која стапи во сила вечара и важи до трети мај, се однесува и за сите оние кои влегуваат на нејзина територија од Грција.