Иран го погуби поранешниот заменик министер за одбрана Алиреза Акбари, кој имаше двојно британско и иранско државјанство, објави Ројтерс.
Тој беше осуден на смрт во четвртокот под обвинение за шпионажа за Велика Британија
Вчера доцна вечерта британскиот министер за надворешни работи Џејмс Клеверли апелираше до Иран да не ја извршува егзекуцијата. Барањето беше поддржано и од американскиот Стејт департмент. Велика Британија ја опиша смртната казна како политички мотивирана и повика на ослободување на поранешниот министер за одбрана.
Иранска новинска агенција рано денеска објави дека казната е извршена, без да каже кога.
Алиреза Акбари, кој беше осуден на смрт под обвинение за корупција и широки дејствија против внатрешната и надворешната безбедност на Иран со шпионирање за разузнавачката служба на британската влада, беше погубен, се додава во соопштението.
Извештајот што го мотивираше егзекуцијата го обвини Акбари, уапсен во 2019 година, дека добил 1.805.000 евра, 265.000 фунти и 50.000 долари за шпионажа.
