Државниот инспекторат за транспорт (ДИТ) вчера се обидел, но не можел да изврши вонреден инспекциски надзор во компанијата „Беса транс“, изјави за МИА директорот Руфат Хусеини.
„Вчера се упативме во просториите на „Беса транс“, во седиштето, но беа затворени, никој не се јавуваше на службените телефони. Оттаму се упативме во седиштата на двете агенции што ги имаат во Скопје, кои исто така беа затворени и немаше никој. Во Тетово знаеме дека има една агенција, но нашиот инспектор оттаму не информираше дека и таа е затворена. Не можевме да извршиме вонреден инспекциски надзор“, изјави Хусеини.
Никој, како што дополни тој, не крева телефон, ниту сопственикот на „Беса транс“, ниту некој во канцелариите вели Хусеини кој најави дека биде доставен писмен допис.
„Ќе закажеме термин за да не пречека и да ја отвори канцеларијата, ако не ја прими доставницата тогаш ќе се изврши достава преку Министерството за внатрешни работи“, најави Хусеини.
Владата на седница го задолжи ДИТ да изврши вонреден инспекциски надзор.
