Серијата неуспеси на ракометарите на Вардар во Лигата на шампионите сезонава продолжи во Унгарија, каде што во период од четири дена повторно загуби од Пик Сегед, овојпат со 34:33.
Двократниот европски првак не ги материјализира ни предноста од три гола во првото полувреме, што го заврши со водство од 19:17, ни одличните Робин Кантегрел на голот, кој забележа 14 одбрани, и Иван Чупиќ во нападот, кој застана на 9 погодоци.
Уште еднаш, по кој знае кој пат, вардарци скапо ги чинеше црниот период од осум минути без гол во вториот дел, кога по 21:21 домаќинот се „одлепи“ со шест погодоци без одговор.
„Црвено-црните“ во финишот се доближија до еден гол негатива, но ништо повеќе од тоа во мечот во кој капитенот Стојанче Стоилов постигна 6 гола, еден повеќе од Тимур Дибиров и од Ловро Јотиќ
Составот на Стевче Алушовски остана на дното од тебелата во групата А со само 3 бода, а шанса да го поправи тоа ќе има во двомечот со норвешки Елверум на 21 и 24 февруари во Скопје.
